Skip to main content

News

Click on each of the links below to view most recent news items:

ថ្ងៃពុធ ២ កើត ខែទុតិយាសាឍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី ១៩ ខែកក្កដា ឆ្នាំ២០២៣ ជីអេស១កម្ពុជា នៃសភាពាណិជ្ជកម្មកម្ពុជា រៀបចំវគ្គបណ្តុះបណ្តាលស្តីពី “ការចុះបារកូដ និងការគ្រប់គ្រងទិន្នន័យសមាជិកបារកូដ” នៅអគ្គនាយដ្ឋានសភាពាណិជ្ជកម្មកម្ពុជា ក្រោមអធិបតីភាព ឯកឧត្តម ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា។

ស្ថាប័នជីអេស១កម្ពុជានៃសភាពាណិជ្ជកម្មកម្ពុជា បើកវគ្គបណ្តុះបណ្តាលនេះឡើងក្នុងគោលបំណងពង្រឹងសមត្ថភាពផ្នែកបច្ចេកទេស ទៅដល់មន្ត្រីបង្គោលផ្នែកបារកូដនៅតាមសភាពាណិជ្ជកម្មមណ្ឌលខេត្តទូទាំងប្រទេស។ វគ្គបណ្តុះបណ្តាលនេះ មិនត្រឹមតែពង្រឹងសមត្ថភាពផ្នែកបច្ចេកទេស និតិវិធី និងកិច្ចសហប្រតិបត្តិការក្នុងការចុះលេខបារកូដប៉ុណ្ណោះទេ ថែមទាំងជាពេលវេលាដ៏ល្អមួយក្នុងការសហប្រតិបត្តិការយ៉ាងស្និតស្នាលរវាងមន្ត្រីជំនាញរបស់ជីអេស១កម្ពុជានៃសភាពាណិជ្ជកម្មកម្ពុជា និងមន្ត្រីបង្គោលផ្នែកបារកូដរបស់សភាពាណិជ្ជកម្មមណ្ឌលខេត្តទូទាំប្រទេស។

បារកូដមានអត្ថប្រយោជន៍ច្រើនណាស់សម្រាប់អាជីវកម្ម ដូចជា កាត់បន្ថយកំហុសឆ្គង ហានិភ័យក្នុងសង្វាក់ផលិតកម្ម ចំណេញពេលវេលា លើកកម្ពស់ផលិតផលអោយមានការទទួលស្គាល់ជាលក្ខណៈស្តង់ដាអន្តរជាតិ ងាយស្រួលក្នុងការគ្រប់គ្រងស្តុក ចរាចរផលិតផលនៅទីផ្សារ នាំចេញក្រៅប្រទេស និងបទដ្ឋានតែមួយចំពោះដៃគូរពាណិជ្ជកម្មទាំងអស់ក្នុងសកលលោក ជាដើម។

ជីអេស១អន្តរជាតិត្រូវបានបង្កើតឡើងនៅថ្ងៃទី ២៦ ខែមេសា ឆ្នាំ១៩៧៤ ដែលមានការិយាល័យកណ្តាលនៅទីក្រុង ប្រ៊ុចសែល ប្រទេសប៊ែលហ្សិក ដែលជីអេស១កម្ពុជា ជាសមាជិកទី១០០នៃសមាជិកទាំងអស់។ មកទល់នឹងពេលនេះ ជីអេស១កម្ពុជាបានប្រតិបត្តិការ ការងាររបស់ខ្លួន រយៈពេល ២០ ឆ្នាំហើយ។ ហើយកាលពី ២៣ ខែឧសភា ឆ្នាំ២០២៣ កន្លងទៅនេះ ជីអេស១កម្ពុជាទទួលបានពានគម្រប់ខួប២០ឆ្នាំ នៅទីក្រុងអាំងវែប ប្រទេសប៊ែលហ្សិក។ ជីអេស១ ជាភាសារអត្ថសញ្ញាណផលិតផល និងមានប្រតិបត្តិការជាង ៦កោដ ប្រចាំថ្ងៃទូទាំពិភពលោក។ ជីអេស១ ជាស្តង់ដាបារកូដ ដែលផ្តល់ភាពច្បាស់លាស់លើទិន្នន័យជាសកលលើផលិតផល និងសេវាកម្ម៕

​​​​​​​

Latest News